الإثنين , نوفمبر 18 2019
الرئيسية / هموم الشعب / حديث الناس في الميكروباص

حديث الناس في الميكروباص

بقلم: وجيه علي

حديث ينقل الالام ومعاناة الناس وقضاياهم اليومية من خلال احاديث يطرحها ركاب الميكروباص فى حواراتهم بعضهم لبعض ، او من خلال مكالمة هاتفية عبر محمول احد الركاب ، وتعقيب وتعليق الركاب على احداثنا اليومية .
واليكم مادار من حوار :
كان الحوار بين شخصين صديقين على مايبدو ، تلاه تدخل احد الراكبات ثم باقى الركاب .
محمود : هى البيوت ايه ياجدع بحر ؟!
فتحى : هوه أنت ماتعرفش ولا ايه ؟!
محمود : الوليه ادتها المرتب وتيجى
النهارده شوف كام وتقولك
الفلوس خلصت .
فتحى. : ( مبتسما) معاها حق .
محمود : ماتجننيش وتقولى معاها حق
فتحى. : هوه أنت مش عايش فى الدنيا .
محمود. : إزاى يعنى ٢٠٠٠ جنية من يوم
٢٤ لحد النهاردة بخ طاروا ؟!!
فتحى : بقولك ايه مش ربنا عرفوه
بالعقل ، ماتحسب اتصرف ايه
وفى ايه وانت حتعرف فلوسك
فين ، وبعدين ياعم ده انا مراتى
نزلت السوق جابت ثوم ، وبذنجان
وقوطة صرفت خمسين جنية !!
محمود : طب والعمل حنفضل كده ؟
فتحى : اصبر..ده الصبر مفتاح الفرج
محمود : انا عايز مفتاح خزنة تدفى
جيوفى وتسد الإبقاق اللى دايما
مفتوحة ، ده الواحد بقى بيكلم
نفسه حتى وهوه نايم ، ونفسنا
اتسدت عن كل حاجه .
فتحى : ده انت كده مش عايز مفتاح
خزنة ، لأ ده أنت محتاج مصحة .
المرأة : وهى تبتسم ، عديها وارمى
حمولك على اللى خلقك ، وصدق
احنا احسن من ناس كتير ،
وبعدين البركة من عند ربنا ، أمال
اللى زى حالاتى تعمل ايه؟ تموت ؟
فتحى : والله ياماما كلامك حكم ، أنتوا
الخير والبركة .
المرأة : بأخد معاش الف ونص ، باكل
وبدفع مية وكهربا وغاز وعلاج ،
واهى مقضية .
محمود: إزاى ، ومنين ؟؟؟
المرأة : ايجارى ٢٠ جنية ، وكهربا ومية
وغاز عمله حسابى على ٢٠٠ جنية
وانا مروحة من البوستة ببضع ،
٢ كيلو لحمة ، على فرختين،
وبجيب كرتونة بيض ، وجبن ،
واملا الثلاجة ، وبتتعشى والحمد
لله ، أهو يجيلك ضيف يلقى ان
بيتك مستور مفيش انزل
اجيب حاجة علشان ضيف عمرانا
ثلاجتنا بالخير دايما .
محمود : طب واللى مابيكلوش غير طازه
المرأة : ده بقى اسمه بطر يكفينا شره
فتحى : الله عليكى ياحاجة، سامع الكلام
المرأة : الواحده لما بتيجى تجوز بنتها
لازم تعرفها تمشى على قد دخل
جوزها ،معاه ماشيه ونحمده ،
وإن ضاقت نقفل بابنا ونحمده
اصل البطن مابتشبعش .
محمود : والله كلامك خفف عنى كتير .
فتحى : يعنى بلاش المصحة النهاردة ،
( الجميع يضحك )
المرأة : ربنا يصلح حالكم ، ويهديلكم
نفسكم ، ويعينكم على ايامكم ،
قولوا امين ، خلاص وصلنا .

عن arabserv InDesign

شاهد أيضاً

“صوت الشعب” تنعي وفاة والدة المخرج هاني عطوة

محمد فتحي رئيس التحرير وحسام أبوالعلا مستشار التحرير، وأسرة تحرير صوت الشعب، يشاطرون المخرج الكبير …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.